Ođđa jagi álggus son diđii duođas, gii son háliida leat olles máilbmái dán rájes. Ánde Matheo, son árvalii, dat lea justa dievaslaš namma. Ii dárbbaš čiegadit maidege. Ii geasge. Ii šat.
Ánde Matheo Sara vuosttaš namma, Ánde, lea duohtavuođas čuvvon su mánnávuođa rájes. Juo dalle skihpárat imaštalle, manin sus lea nieidda namma, vaikko sii eai oaidnán dan nieidda. Danin gohčodedje su Ánden, gii son lea virggálaččat easkka dál.
Nuppi nama, Matheo, válljemis son lea čuvvon sámi nammaárbevieru – nuppegežiid. Dat lea sutnje álo leamaš hui dehálaš, go sáhttá čatnat iežas iežas sohkii ja nama duohken lea muitalus, sohkaoktavuohta.
– Dál mun lean iežan bártni gáibmi. Go jus mun livččen riegádan dievdoolmmožin, de mun livččen iežan bártni bidjan iežan gáibmin, Ánde Matheo Sara dadjá.
– Midjiide sápmelaččaide lea dehálaš, ahte mii bidjat muhtima gáibmin.
Iežas ovdanama lonuheapmi lea ovdamearkka dihte Suomas dál dábálut go goassege ovdal. Digi- ja olmmošdiehtolágádusa statistihkain oidno treanda, mii stuorru gulul. Yle muitalii gieskat, ahte eandalitge lundui laktáseaddji ja sohkabealleneutrála namat leat bivnnuhat.
Lei áigi muitalit iežas duohtavuođa buohkaide
Dál Ánde Matheo Sara nama lonuheamis lea easkka moadde vahku. Sara ii máhttán oba vuorditge nu buori vuostáiváldima. Son suorganii, mo servodat ja bearaš válde su vuostá nu bures.
– Dat lei čiegusvuohta, man mun lean guoddán fargga 35 jagi. Dál lei áigi, ahte mun ferten lávkehit ja muitalit iežan duohtavuođa, ahte lean riegádan vierro gorudii, čilge Ánde Matheo Sara.
Son háliidii muitalit namalassii dan, ahte sus lea ođđa namma ja son lea eallán vierro gorudis.
Balai olbmuid reakšuvnnain
Ánte Matheo Sarai lossadamos leamašan eallit iežas jurdagiiguin, fargga 35 jagi áigge. Dál goittotge deaddu lea hárduid alde geahppánan sakka. Eallimis šattaige hui olu geahppasot, go beasai muitalit duohtavuođa iežas birra. Eaige olbmot guođđán su, vaikko balaige das.
– Mun ballen, mo olbmot reagerejit dasa, muitala Sara.
Son árvala, ahte stuorát birrasis livččii kánske leamašan vehá álkit eallit. Son lea ieš bajasšaddan unna gilážis.
– Mis lea vehá losit, go gii bajásšaddá stuorra servodagas, stuorra gávpogiin, čilge son.