– Mun lam taggaar, ete tuostâm keččâliđ, valdâl aanaarlâš Riikka Morottaja jieijâs.
Sun lii kieskâd vuáđudâm irâttâs muččâdvuotâ-suárgán. Sunjin lâi tehálâš faallâđ palvâlus páihálijd ulmuid, iäge taan syergi palvâlusah lamaš Anarist.
– Moonnâm čoovčâ šoodâi juurdâ, ko lam lijkkum pieijâđ jieččân koozâid. Talle moonnim Helsigân škovliittâsân, kost valmâštuvvim kozzâteknikkárin, muštâl Morottaja.
Korona ääigi maŋa maaŋgah irâtteijeeh láá karttâm joskâđ toimâidis já killám maaŋgânáál pandemia keežild. Morottajast še láá maaŋgâlágáneh paloh, mutâ paloid ij pyevti adeliđ liijkás ennuv saje.
– Ko mun kavnim šiev pargo olssân, te kale mun halijdâm keččâliđ. Ijhân tom tieđe, jis puáttee čoovčâ lam uv jo pargoost kostnii eres saajeest, hundâruš Morottaja.
Maaŋgâid aašijd kalga porgâđ, smiettâđ já tiettiđ ovdil ko puáhtá älgiđ irâtteijen. Iše sun lii uážžum eres irâtteijein já Aanaar kieldâ irâttâsstivrejeijest.
Peerâeellim já irâttâs ovtâstittem ij lah älkkee
Riikka Morottaja perrui kuleh käälis já kyehti alge. Suu mielâst peerâeellim já irâttâs ovtâstittem ij lah ain lamaš älkkee, mutâ stuorrâ iššeen lii lamaš käälis Eero Morottaja.
– Juuttim kozzâškovliittâs talle ko lâi korrâsumos pygálys äigi. Eero halijdij tuárjuđ tom nuuvt, ete vaaldij párnáid eenâb suin. Ubâ peerâ lii lamaš fáárust, ete lam puáhtám porgâđ irâttâshommáid.
Morottaja lijkkoo porgâđ pargoid olssis já illood ko puáhtá jieš meridiđ pargoaaigijd. Sun parga tääl argâpeeivijn käävcist neelji räi, vâi puáhtá leđe párnáigijn ehidijd já oholoopâid.
Yle Säämi Kesikyessi-rááiđu puáhtá kuldâliđ radiost jyehi vuossaargâ já meiddei Yle Areenast.