Oliver Paadar šoodâi puásuiperrui, mutâ sust ij šoddâm puásuialmai. Puásuiperruin lii távjá tuoivâ, ete kiinii párnáin perustuuččij puásuipargoost já juátká maaŋgâi suhâpuolvâi pargo.
Paadar perrust lii puásuitáálu já mađhâšemirâttâs Solojäävrist Anarist. Oliver Paadar äijih já ákku vuáđudáin taid jo ive 1982 já tääl suu vanhimeh lává juátkám pargoid.
Puásuipargoh iä lah kuássin kiäsuttâm Paadar. Ko pajetääsist hundâruššii já keččii puátteevuođâ máhđulâšvuođâid, te Paadar lâi vises, ete ij čuávu eejis pálgáid puásuialmajin.
– Ko tárkkojim puásuituállei pargomere já päälhi, te iberdim ete jiem tuođâigin lah perustum pargoost.
Puásuituálu lii ohtâ sämmilij ärbivuáválijn iäláttâsâin. Oliver Paadar mielâst pargo ij lah kuássin lamaš mielâkiddiivâš já sun uáiná tom puárisáigásâžžân.
– Eidu ko lam tággáár teknologia olmooš, te tot oro munjin puárisáigásâžžân já kenski tot tarbâšičij váhá peividem, Paadar hundâruš.
Paadar halijdij pargo, mast lii pyeri pälkki já mast láá pargosajeh. Tondiet sun varrij-uv Jyväskylän áámmátškoovlâ maŋa já algâttij mittedem spesialist pargo.
Puđâldâsâst šoodâi vahâgist pargo
Oliver Paadar áásá ain Jyväskyläst já parga olesáigásávt sosiaallâš media. Sun ráhtá TikTokkin videoid tiätturspeelâin já tekniikist.
– Lam ain lijkkum rähtiđ videoid. Hävskivuođâ tiet rahtim TikTokkin video, mutâ ulmuuh lijjii-uv perustum tast ja video miänástui hirmâd pyereest, Paadar čielgee.
Videoid láá keččâm čyeđeh tuhátteh ulmuuh já sij láá meid kommentistám já lijkkuum videoin ennuv. Paadar raahtij ain eenâb videoid já spellâmvuolgâttâsâid peivipargoi maŋa.
– Mun ain peivipargo maŋa vuoiŋâstim váhá já talle vuolgâttim nelji tijme stream-vuolgâttâs. Tom maŋa vala rahtim videoid muáddi tijme, Paadar muštâl.
Tággáár pargoliähtu piištij maaŋgâid mánuppoojijd ovdil ko sun meridij, ete ij innig killáá já haalijd vuáijuđ eenâb tuše sosiaallâš median.
Haalijd leđe Suomâ pivnohumos tekniikvideoi rähtee
Oliver Paadar almostit TikTokist videoid, main sun čáittá, čielgee já keččâl jieškote-uvlágán tekniiktarbâšijd. Sust láá paijeel 56 000 čuávvoo já pivnohumos video láá keččâm masa 600 000 kerdi. Tom videost sun tivo 25 euro tiättur spellâtiäturân.
Oliver Paadar mielâst ličij hävski, jis puátteevuođâst sun sämmilâžžân ličij puoh enâmustáá keččum tekniikvideoi tahhee Suomâst.
Sämmilâšvuođâ sun ij kuittâg pyevti oovdân aktiivlávt videoin, mut ij ereskin persovnlijd aašijd. Sun haalijd vuáijuđ eenâb jieš tekniikân. Stream-vuolgâttâsâin sun kale västid já savâstâl persovnlijn aašijn.
– Kenski mun váhá velttâlâm sämmilâšvuođâst sárnum, ko motomin láá puáttám váhá ahevis kommenteh, Paadar muštâl.
Tivvojum 1.8.2023 tijme 14.04 Ingressin tiätu, ete meid ááhust láá lamaš poccuuh.