Kuobžâ-Saammâl Maati Petter, Petter Morottaja lii kiergânâm elimis ääigi porgâđ ennuv anarâškielâ oovdân. Sun lii máttááttâm já tutkâm anarâškielâ, čáállám maaŋgâlágánijd kiirjijd já ráhtám párnáid siskáldâs anarâškielân.
– Tot lii olssân masa jiešmeidlist čielgâ äšši. Mohtâ toos kávnoo jieččân tuáváá keežild, iätá Morottaja.
Anarâškielâ oovdân porgâmist iššeed positiivlâš macâttâs, mutâ meid tot et puoh materiaal šadda kiävtun já iäráseh hietih suu iäljárušmist.
Petter kielâminutteh älgih tuorâstuv
Uđđâsumos äššin Petter Morottaja lii juátkimin eejis Matti Morottaja äärbi kielâminuttist. Kielâminutteh láá uánihis kielâpaketteh anarâškielân anarâškielâst. Vuosmuuh kielâminutteh láá almostum 1990-lovvoost.
Suu ulmen lii kieđâvuššâđ fáádáid keppisávt, veikkâ fáddán ličij-uv korrâ kielâoppâ. Uđđâ uási almostuvá suullân ohtii máánust.
– Mun arvâlâm et ovdâmerkkân sánádâhân kyeskee ääših láá mielâkiddiivááh. Sättih joba leđe äigikyevdileh ääših, et mii lii kieskâd oinum anarâškielâ orroomvisteest, hundâruš Morottaja.
Morottaja váldá vuástá meid iävtuttâsâid já fáádáid. Taid puáhtá vuolgâttiđ suu šleđgâpoostân petter.morottaja@oulu.fi.
Vuosmuš Petter kielâmiinut almostuvá 12. peeivi roovvâdmáánu. Puáris já uđđâ kielâminuttijd puáhtá kuldâliđ Yle Areenast.
Onnâ kielâkevtteid: jieijâs rammum lii tehálâš
Kielâoppâmist ij vaarâ kuássin šoodâ valmâšin. Kielâčeppi Petter Morottaja muštoot, ete juáhháást lii jieijâs kielâoppâmpäälgis. Tergâd lii adeliđ ääigi jieijâs uáppoid já oskođ, ete uápuid juátkimáin piäsá mooláid, rävvee Morottaja.
– Ohtâ avžuuttâs lii kuldâliđ já luuhâđ ennuv já tuostâđ. Jieijâs rammum tom pálgást ovttuu lii tehálâš. Jis ain smiättá tom mon hyeneeht máttá, te tot lii taggaar juurdâ mii tuárju jieijâs já oppâm lii vaigâdub.
Maaŋgah opâttâleh anarâškielâ eskin rävisin. Morottaja muštoot, ete aalgâst kalga sárnuđ váhá oovtâkiärdánub aašijn, maŋeláá muálkkáábijn.
– Kalga sárnuđ tego páárnáš, ovdil ko puáhtá sárnuškyettiđ rävisulmui aašijd.
Motomeh láá oppâm kielâ jo pärnivuođâst mut eellimtile keežild kielâ lii uásild vájáldum. Vuosmuš lävkki suu mielâst lii mieđettiđ, ete ij määti tâi mušte puoh, mutâ meid mušteđ et taid aašijd puáhtá oppâđ uđđâsist-uv.