Kuopios organizuijah rastavan synnynpiän kaikile avvonaine da ilmaine rastavanmurgin Hatsalan školan syömäläs. Nengoine yhtehistölline rastavanmurgintapahtumu pietäh Kuopios nygöi enzimästy kerdua.
Organizuiččijoinnu on joukko kuopiolastu sociali- da tervehysalan järjestyö sego prihodua. Ruadajat muvvostetah Yhtes enämbi -ruadojoukon, kudai koordiniiruiččou pivon planiiruičendua, dengoitustu da todevutandua. Tapahtuman dengoittamizeh on suaju äijy lahtoitustu.
Suurembale, enäm 400 hengeh niškoi piettäväle rastavanmurgintapahtumale on nägynyh tarvehtu, nenga sanou ruadojoukon paginanvedäi Marko Haakana.
– Äijät ristikanzat virittih moizeh ruadoh. Sociali- da tervehysalal ruadajes tiijämmö, gu moizien tapahtumien tarveh rubieu vai kazvamah tulieloin vuozien aigua.
Tarkoituksennu on luadie rastavanmurginas perindeh, kuduas tarittavannu olis sežo rastavallistu programmua. Kuopios otetah mallii Jovensuun Rastavanmua-murgintapahtumas, kuduadu on pietty jo piäl 20 vuvven aijan.