Erähät Ylen pagizuteltulois varzinassuomelazis jo tietäh, kedä hyö iänestetäh, ga äijät vie mietitäh omassah iänestyspiätösty.
Toizielpäi piätökset piädy luadie jo teriämbäzeh, tahtonet iänestiä edukyndeh. Ennepäi-iänestys zavedih kolmanpiän 17. pakkaskuudu.
Turrun kaupputoril yksittäzet siiričiastujat azetutah kaččomah prezidentanvalličuksien ehoitettuloi ozuttajan suuren rekluamutaulun edeh.
Kai yheksä kandiduattua on keräl noumerujälletykses. Muite suovatan röččysiäl tori on aiga hil’l’aine. Valličuspalatkoi ei nävy, sendäh gu monet ehoitetut ajellah muan eri čurii myöte da pietäh vastavundoi rahvahanke ezimerkikse laukkukeskuksis da tapahtumis.
Vuvven 2018 prezidentanvalličuksien enzimäzes valličuskerras Suomes eläjien Suomen kanzalazien iänestysprosentu oli statistiekkukeskuksen mugah tilastokeskuksen mukaan 69,9 prosentua.
Valličuksis iänestettih edukyndeh piäl puolet iänestännyzis libo 52,5 prosentua.
Erähät kanzalazet varmat da erähät vie duumaijah, kedä iänestettäs
Turrun toril ehoitettuloin rekluamutauluu kaččelii Pirjo Hakala on jo läs varmu, kelle häi andau omassah iänen.
– Jo tiijän, kedä iänestän, ga mieleh on kaččuo kuvat da noumerat vie kerdaine. Vaikuttau se, gu yksi kandiduatois on hyvin tuttu. Toine kierros voibi olla vaigiembi.
Lietolaine Santeri Kirsilä vie duumaiččou kahten ehoitetun välil. Hänen mugah valličendu ei ole kebjei dielo. Ehoitetut ollah oldu läs yhtenjyttymät.
– Tärgiembii ollah turvalližusdielot, uskottavus da kogemus.
Salon jarmankal mieldy kiinnitti prezidentukandiduatoin vastavundu
Salon jarmankal rahvas jonotettih piäzendiä prezidentuehoitettuloin paginoile. Heijän kampuaniipalatkat oli sijoitettu Salozualan juoksusuorale. Kandiduatat käydih sežo lavale ezittämäh iččie rahvahale.
Salon jarmankal pyhänpiän keräl oldih Sari Essayah, Alexander Stubb da Jussi Halla-aho. Kaikil oli muidugi pidoloi Varzinas-Suomes pyhänpiän.
