Gárasavvonlaš 14-jahkásaš Elle Káren Ketola ja 13-jahkásaš Siiri Ketola leaba mánáid- ja nuoraidprográmma Galaxi ođđa láidesteaddjit. Galaxi lea dárkkuhuvvon skuvlaahkásaš mánáide ja nuoraide, ja das nuorat ieža buvttadit sisdoalu.
Ketola oappážat leaba mielde Galaxi suomagielat sisdoaluid lassin maiddái guovtti davvisámegielat ráiddus, mat almmustahttojit Yle Areenas. Nubbi dain lea 8 jagiáiggi.
– Dán prográmmas muitalit dieđusge sámiid gávcci jagiáiggis ja čuovvut munno eallima birra jagi dáppe unna gilis Gárasavvonis, muitala Elle Káren Ketola.
– Ja moai hálidetne muitalit dáinna prográmmain lea ahte ále beroš maid earát jurddášit ja lehpet duostilat, lasiha Siiri Ketola.
8 jagiáiggi -nammasaš ráidu čuovvu oappá guoktá árgaeallima ovtta jagi áigge Gárasavvonis oktiibuot ovcci prográmmaoasi veardde. Vuordimis leat maiddái čuvges ijat, skábmaáigi ja dieđusge bohccuid ja beatnagiid dikšun. Elle-Káre ja Siiri liikoba maiddái festet iešguđet dáhpáhusain ja mátkkoštit.
”Sámegielat sisdoalu ovdagovat”
Mánáid- ja nuoraidprográmma Galaxi buvttadeaddji Krista Karppinen muitala, ahte sii hálidit nuoraidprográmmain čájehit árgabeaieallima maiddái eará sajiin Suomas go dušše gávpotguovllus. Jurdda ovttasbarggus vulggii das, go sii ieža Yles fuobmájedje, ahte skuvllalaččaide ii leat makkárge sisdoallu sámegillii.
– Dát lea fiinna ášši fállat sámegillii maid sisdoalu skuvllalaččaide. Mii hálidit fáhtet buot Suoma skuvllalaččaid, dadjá Karppinen.
Sámegielat skuvlaahkásaš mánáide ii dál leat Suomas olus sisdoallu. Karppinen sávvá, ahte prográmmas oaidnit ain boahtteáiggisge sámenuoraid.
– Sisdoallu juksá sihke suoma- ja sámegielat olbmuid, ja sávvat ahte dát joatkašuvvá. Elle-Káren ja Siiri leaba sámegielat sisdoalu ovdagovat, dadjá Karppinen.
Galaxi bargá ain dán jagi ovttasbarggu Ketola oappážiiguin ja ođđa prográmmat leat barggu vuolde. Nuppi ráidui šaddet vihtta oasi, main nieidda guoktá čiŋaheaba iežaska lanjaid.
Elle-Káre ja Siiri Ketola leaba ieža plánen prográmmaid sisdoalu.
– Jos jurddaša boahttevuođa, de mii hálidit leahkit mielde eará prográmmain ja seammasullasaš prográmmain, muitaleaba Ketola oappážat.