Pohjalazih jogiloih ennustetah tavanmugastu suurembua viennouzendua. Lundu on ylen äijy da jiä on sangei, ezimerkikse Kyrönjovel nenga puoli metrii, sanou ely-keskuksen johtai vezitalovusspecialistu Katja Haukilehto.
– Lundu on tavanmugastu enämbi, da sendäh tänä keviän viennouzenduagi roih suurembua, sanou Haukilehto.
Vie lumet yhtelläh ollah sulettugi vuotettuu hillembäh. Ni lundu ei pannuh eigo ni röčännyh da yölöil olettelou pakkastu.
Täl kodvazel viennouzendan teriä ennustetah Suvi-Pohjanmuale sulakuun alguh da Keski-Pohjanmuale sulakuun keskivälih. Dielot yhtelläh voijah muuttuo ruttoh.
– Pyzynöy siä lämmänny da vihmunou, sit sulandu järgieh rutostuu. Nygöi konzu ei äijiä ni lundu pannuh eigo ni röčännyh, sulandu on hillembi, da neče on juuri se, midä myö tahtommo, sanou Haukilehto.
Ylen pahan viennouzendan riskua ei ole, ga hyvä on tiediä jo edukyndeh varavos, midä duumaijen tyhjendetähgi tego- da reguliiruičusjärvii.
Perhonjoven suuremban tegojärven, Padanan tegojärven, pindua on alendettu piäl kolmen metrin, da tarkoituksennu on suaja vienpindua vie kahtu metrii alembakse.
Kalajärven libo Kyrönjoven suuremban tegojärven pindua on alendettu kahtel metril, da tavoittehennu on tyhjendiä tegojärvie vie metril.
Lapuanjoven suuremban tegojärven, Hirvijärven, pindua sežo on alendettu puoleltostu metril, da tarkoituksennu on alendua sidä vie vähimyölleh samazen verran.
Jogiloin virduamat ollah nostu enäm rannikon suvizis pienis jogilois, ezimerkiske Lapväärtinjovel, Teuvanjovel da Närpiönjovel.
Kyrönjoves da Lapuanjoves vienpindu sežo on nossuh midägi kymmenii santimetriloi, ga viennouzendan korgevuksis ollah vie loitton. Perhonjoven pindu nivouse vie ei ole nossuh.