Ohcejoga skuvllalaččat leamašan duhtameahttumat skuvlapsykologa bálvalusaid fidnemii. Skuvlapsykologa lea fitnan gilis dušše guktii jagis ja ráiddut psykologabálvalusaide leamašan guhkit.
Ohcejotnjálmmi ovccátluohká oahppit leat vásihan, ahte ohcejohkalaš nuorat leat sierraárvosaš sajádagas stuorát gielddaid ja gávpogiid oahppiiguin.
Dilli galggašii goittotge buorránit dán vahkus go Ohcejogas álggaha sámegielat psykologa, muitalit Lappi buresveadjinguovllus.
Ohcejotnjálmmi skuvlla oahppit illudit ođđasis, muhto oidnet dehálažžan sihkarastit bálvalusaid joatkašuvvama maid boahttevaš jagiid. Lappi buresveadjinguovllu mielde psykologa ii leat báhcimin bargui bissovaččat.
– Bargoveahka molsašuddá dáppe hui dávjá. Dat lea váttis, go ferte juohkehažžii ođđasit muitalit áššiid, go ovddit bargi vuolgá, dadjá Ohcejotnjálmmi skuvlla oahppi Saima Niemelä.
Psykologa bálvalusaid váilun váibadahttá, muitalit nuorat
Skuvlapsykologa dutká earret eará oahppováttesvuođaid, ja dákkár dutkamušaide beassan leamašan hástaleaddji Ohcejogas. Nuorat muitalit, ahte dutkamušaid ádjáneapmi ja psykologa doarjaga váilun lea váibadahttán muhtun ohppiid.
– Dilli vearrána oba áigge ja dasto nuonddahallet, dadjá oahppi Enni Kunttu.
Psykologabálvalusaid oažžun lea meroštallojuvvon lágas. Oahppiid vásáhusa mielde dat ii leat ollašuvvan Ohcejogas. Psykologa lusa lea beassan dušše earenoamášoahpaheaddji bokte.
– Mun lean oba eallima ássan Ohcejogas ja easka dán jagi čielggai, ahte dáppe fitná guktii jagis olmmoš, gean lusa galggašii beassat háleštit, imaštallá Katri Lukkari.
Skuvlapsykologat váilot Ohcejoga, Anára ja Kolari gielddain
Psykologalihttu lea gidden fuomášumi váttisvuođaide fidnet psykologa bálvalusaid oahppolágádusain dan maŋŋá, go bálvalusaid ordnen sirdásii buresbirgenguovlluide. Dat čielgá Suoma psykologalihtu čielggadanbivdagis, mii lea doaimmahuvvon guovlohálddahusdoaimmahagaide guovvamánus.
Skuvlapsykologa váilu oalát Ohcejoga, Anára ja Kolari gielddain ja Soađegilis fállet skuvlapsykologa bálvalusaid muhtun oasil, muitala Suvi Seikkula Lappi buresveadjinguovllus.
– Rekryterenváttisvuođaid geažil Lappis leat erohusat das, mo psykologabálvalusaid lea vejolaš oažžut. Buresveadjinguovllu mátki lea easka álggus, ja danin bálvalusaid ja bargovugiid ovttaiduhttimis lea vel olu bargu.
Psykologaid váiluma geažil muhtun bálvalusaid, dego psykologa dutkamušaid, šaddet oastit ja psykologa ságastallandoarjaga sajis fállet psykiátralaš buohccedikšára doarjaga, muitala Seikkula.
Psykologabálvalusaid rašes dilli lea bistán máŋga jagi, dadjá doavttir Heidi Eriksen, guhte jođiha sámiid psykososiálalaš doarjjaovttadat Uvjja. Son muittuha, ahte maid Uvja fállá mánáide ja nuoraide ságastallanveahki ja vuođđodási mielladearvvašvuođabálvalusaid.