Oslo diggegoddi hilggui maŋŋebárgga buot Fovse-akšunisttaid áššáskuhttimiid. Okta akšunisttain Elle Rávdná Näkkäläjärvi illuda vuoittus.
– Miihan diehtit historjjálaččat, ahte ii sápmelaš leat vuoitán nu dávjá. Mun in várra duostan beare alla vuordámušaiguin mannat, muhto seammás mun dihten álo, ahte dat lea riekta maid mii bargat, son dadjá.
Akšunisttat vurdet čuovvovažžan guoddalago Norgga stáhta mearrádusas.
– Jus sii eai guoddal, de mii leat vuoitán ja jus sii guoddalit, de šaddat ođđasit mannat diggái.
18 miellačájeheaddji šadde diggái dan maŋŋá, go diibmá giddejedje Norgga oljo- ja energiijadepartemeantta njealji jándorii. Miellačájáhusas háliidedje čalmmustahttit Fovsenjárgii lobiheamet huksejuvvon bieggafámu.
Rievtti eanetlogu mielde miellačájeheddjiin lei riekti ráfálaš vugiin čoahkkanit ja čájehit miela. Riekti deattuhii mearrádusastis erenomážit dan, ahte miellačájeheamit ledje stáhta olmmošvuoigatvuođarihkkuma vuostá.
Norgga alimus riekti attii jagi 2021 duomu, man mielde Fovsenjárgga bieggafápmorusttegat rihkkot sápmelaččaid olmmošvuoigatvuođaid.
Duddjon veahkeha dovdduid gieđahallamis
Dikkegottis čohkkán ja duomu vuordin leamašan lossat, muitala Elle Rávdná Näkkäläjärvi. Sámi našuvnnalaš gealboguovddáš SÁNAG lea fállan Fovse-akšunisttaide ságastallanveahki.
Maid duddjon lea veahkehan Elle Rávdná Näkkäläjärvi gieđahallat dovdduid. Son studere duoji Sámi oahpahusguovddážis Anáris.
– Dat lea hui dehálaš álo go bessen fas deike boahtit ja duddjot ja oaidnit dan, ahte muhtun áššit goit mannet ovddosguvlui das go juohke gorostaga goarru, de dat lei hui buorre.
