Pori sai piettäväkse ylehissportan Kalevan kižat vuvvennu 2027. Kižoin organizuičendas vastatah Porin Ylehissportu, Noormarkun Nopsa da Nakkilan Vire.
Neččih dieloh näh suovattan piätti Helsingih kerävynnyh Suomen Sportuliiton liittovaldivosto.
Iellizen kerran Suomen muasterižuksis on kižattu Poris vuvvennu 2015.
Pori sai Kalevan kižat iänestyksen jälles. Kalevan kižoin piendäh pyrrittihes Porin ližäkse Oulu da Lappeenrandu.
Tänä vuon Kalevan kižat ollah Vaazas, tulien vuon Espoos da vuvvennu 2026 Jyväskyläs.
Suovattan pietys liittovaldivoston kerähmös paissuh Suomen Sportuliiton paginanvedäi Riikka Pakarinen sanoi, gu Suomel pidäs pyrgiekseh vuvven 2030 ylehissportan EM-kilvoin piendäh Helsingis.