Professor Rauna Kuokkanen avžuuttiij Ávvir-loostâ paječallust ulmuid leđe jienâsthánnáá puáttee keesi sämitiggevaaljâin. Tyehin lii alemuu haldâttâhrievti miärádâs uđâdiđ ive 2023 sämitiggevaaljâid.
Suomâ sämmilij kuávdášseervi já Sämirääđi saavâjođetteijee Aslak Holmberg mielâst Suomâ tiggevuáhádâh taha sämmilii jiešmeridemvuoigâdvuođâ vuástá, ko lii páguttâm vaaljâluvâttâlmân ulmuid, kiäh iä poorgâ sämiaašij peeleest. Sun kuittâg avžut ulmuid servâđ valjáid já jienâstiđ.
– Mun jiem kal uáini maiden pyere tast, et jis mii älgip boikotistiđ täid vaaljâid. Mun uáinám tuše hiäjus peelijd tast, ko talle mij ličijm skeŋkkiimin vaaljâid opposition, läddimielâg ulmuid. Mun kal uáinám hirmâd tehálâžžân, et mij ain killáp porgâđ Sämitige várás vâi tot piso sämmilii haaldust, muštâl Holmberg.
Suomâ alemus haldâttâhriehti meridij lasettiđ vaaljâluvâttâlmân 65 ulmuu, kiäi ucâmušâid Sämitige vaaljâlävdikodde lâi hilgom. Holmberg mielâst miärádâs lii sämmilii uáinu vuástá, mut saahâ lii tommit uccâ meereest, et tot ij hirmâdávt vaaigut valjâpuátusân.
– Ij lah nuuvt stuorrâ lovo pirrâ saahâ, et sij pastaččii nuuvt hirmâd ennuv Sämitige siskiipeln muiviđ, mut jis mij älgip boikotistiđ vaaljâid, te tallehân sij uážžuh ain stuárráb saje tobbeen, iätá Holmberg.
Tiina Sanila-Aikio, kii tuáimá taan ääigi sämipalgâsij saavâjođetteijen, kommentist ääši nuorttâlâš politijkkárin já Sämitige oovdiš saavâjođetteijen. Sun ij aalgâst táttum oskođ alemuu haldâttâhrievti miärádâs väzziđ sämmilii jiešmeridemvuoigâdvuođâ paijeel. Suu mield Sämitigge lii páguttum toollâđ uđđâ vaaljâid já jienâsthánnáá pääccim ij oovded maiden.
– Boikotistem kolgâččij leđe ennuv stuárráb, et ovdâmerkkân ep tolâččii uđđâ vaaljâid, iätá Sanila-Aikio.
Sanila-Aikio kuittâg ibbeerd jurduu tast, et kuáđá jienâsthánnáá.
Anarâšah seervi saavâjođetteijee Jarmo Katajamaa muštâl, et sii servi lii siämmáá uáivilist seervi oovdiš saavâjođetteijein Anu Avaskarijn, kiän mielâst vaaljâi boikotistem puávtáččij joba hettiđ Sämitige tooimâ já kulttuurjiešhaldâšem.
– Demokratia sämisiärváduvvâst kalga nanodiđ. Jienâstemvuoigâdvuotâ já tom kevttim lii demokratia olášum iähtu. Ađai jienâstiđ, avžut Katajamaa.
Tiivvum 17.4. tme 12.48: Lasettum tiätu, et Tiina Sanila-Aikio ij táttum oskođ alemuu haldâttârievti miärádâs. Ovdil muštâlijm, et sun ij oskom boikotistemiävtuttâs. Sanila-Aikio kommentistij ääši nuorttâlâš politijkkárin já oovdiš Sämitige saavâjođetteijen. Meddâlistum Sanila-Aikio siitaat tuhhiittiđ ahr miärádâs, jis jienâst vaaljâin. Sun tuše kiärdui Kuokkanen jurduu.
Tiivvum 17.4. tme 12.59 :Ingressi muttum, tondiet ko Sanila-Aikio kommentistij ääši nuorttâlâš politijkkárin já oovdiš Sämitige saavâjođetteijen. Meddâlistum koskâpaječaalâ.