Lappi buresveadjinguovllu guovlohálddahus čoahkkana gaskavahkku smiehttat gos sii sestet 98 miljovnna euro. Seastinplánat leat máŋggat. Seastinplána guvttežis oktan seastinmoallun lea Ohcejoga seaŋgaossodaga gidden.
Seaŋgaossodaga giddenplána ákkastallet dainna, ahte Ohcejogas leat olu olbmot, geat dárbbašit guhkesáigge divššu, iige seaŋgaossodat leat dan várás.
Akuhtadivššu dárbbuide leamašan 2–3 saji ja dat lea menddo unna ovttadat, ahte dan gánnehivčče doallat, muitala dearvvasvuođahoavda Miia Palo Laphas.
Seaŋgaossodagain olmmoš oažžu divššu birra jándora. Divššuin dárkkuhit ovdamearkka dihte infekšuvnna divššu, buohcci dili čuovvuma ja vaikko čuohpadusa maŋŋá addojuvvon dikšu, ovdalgo olmmoš sáhttá máhccat ruoktot.
Seaŋgaossodagas gártet máŋgii maiddái boares olbmot vuordit, ahte ožžot saji bálvalanássanbáikkis.
Seaŋgaossodagain addojuvvon dikšu lea Lappis 80% divrasut, go eará báikkiin Suomas.
Seaŋgaossodaga sadjái ođđa doaimmat dego ruovttubuohcceviessu
Seaŋgaossodaga vejolaš giddema maŋŋá áiggošedje bidjalit oktii máŋga doaimma. Bálvalanássama lassin fállun livčče eanet ruovttus dikšun.
Ođđa doaibman álggášii ruoktobuohcceviessu. Dakkár doaibma doaibmá jo Anára gielddas.
Ruoktobuohcceviesuin oaivvildit dakkára, ahte olmmoš ii dárbbaš guhkká veallát buohcceviesus, baicce beassá árabut ruoktot. Ruovttus sáhttet addit degomat antibiohta- dahje bákčasiid geahpedeapmái oaivvilduvvon dálkkasdivššu. Dan addá juogo buohccedivššár dahje doavttir.
Bálvalanássama báikkiide áigot várret friddja báikkiid, jus giinu dárbbaša mieđuštandivššu dahje divššu oanehaš boddui (sg.intervallihoito).
Bálvalanássamin dárkkuhit dakkár ássama, mas olmmoš ássá iehčanassii iežas visttis ja oažžu divššu birra jándora, jus dárbbaša. Divššu addá dábálaččat lagašdivššár (sg.lähihoitaja).
Eanodahkii eai rievdadusat
Dálá seastinplána ii čuozašii Eanodaga bálvalusaide. Lapha virgeolbmuid evttohusas Muonás seaillošii seaŋgaossodat, dadjá Palo. Maiddái Eanodagas ovddidivčče ruovttubuohcceviesu bálvalusaid. Dat buoridivčče bálvalusaid oažžuma sámegillii ja oahpes kultuvrrabirrasis, muitalit Lappi buresveadjinguovllus.
Dárkilut seastinplánat oktan áigetávvaliiguin leat dieđus 22.4. dan maŋŋá, go Lappi buresveadjinguovllu stivra lea mearridan áššis.