Bensen hakso ja mohtorat hurret go golbma skihpáračča ovttastallet. Minna Lipponen, Nina West ja Henna Kaarakainen leat gávnnadan oktasaš astoáiggebuđaldeami oktavuođas. Sii liikojit vuojašit mohtorgielkkáiguin.
– Mii liikot vuodjit, mii liikot oahpahallat ovttas. Dieđusge go gielkkáin vuodjá,de fertejit leat olbmát, ithan don sáhte okto vuolgit meahccái, muitala West.
West lea bargan bohccuiguin olles eallináiggi ja vuodján mohtorgielkkáin jo nuorravuođa rájes. Son oassálasttii moadde jagi dassái vuodjingursii, gos oahpahalle vuodjit gielkkáin obbasis. Seamma gursii oassálasttii maid Lipponen. Dan rájes álggii sudno ustitvuohta ja ovttastallan mohtorgielkkáin.
Nissoniid vuodjinjoavkku goalmmát oassebealli Henna Kaarakainen lea searvan nissoniid vuodjinjovkui easkka diibmá.
– Isken oktii mohtorgielkkáin vuodjima ja mearridin, ahte nuppi dálvvi in áiggo leat gielkká haga. Nuba osten ”Kalervo”, son lea mu ráhkis, bohkosa Kaarakainen go muitala iežas vuojánis.
Juohke ovttas lea ulbmilin vuojašit mohtorgielkkáin nu olu go astet ja sáhttet, ja sii hálidit oahppat maid teknihka ja vejolaččat vehá divoditge iežaset fievrruid. West muitala, ahte sis lea olu maid oahppat.
– Dego vaikko luonddus johtit, eatnamiid lohkat, ieš dan gielkká teknihka ja maid vuodjinteknihkaid, logahallá West.
Nissonat leat gaskan vuojašeami bisánastán dolastallat ja gáfestallat. Reaškkas gullo jo guhkás, vuodjima lassin čoavje- ja njálbmedeahkit ožžot barggu.
Muhtimin leat geavvan unna bárttitge
Vaikko sii vuojašit olu ovttas, de eai sii leat earáid guođđán olggobeallái. Anára gielddas gávdnojit moaddelot nissonolbmo, geat deaivvadit ja fitnet vuojašeamen unna reaissuid.
West ja Lipponen ovdamearkka dihte leaba dán giđa áigge fitnan gitta Ruoŧa beale duoddariin vuojašeamen viđa eará nissonolbmuin.
Bárttitge leat vuodjinjovkui geavvan. Sii leat ovdamearkka dihte ferten hutkat koanstta mo veahkehit nuppi, jus lea nohkkon oljjus gasku meahci.
– Mora-buvkku tohpas šaddá buorre reaidu mainna sáhttá ovtta gielkkás váldit oljju ja bidjat nuppi gielkái, rávve Kaarakainen mojunjálmmiin.
– Oktii lei stártaboallu jikŋon ja dasa bođii almmáiolmmoš veahkehit. Son liggegođii dakkár gássaliggenrusttegiin, de dathan álggii buollit, muitala Lipponen iežas bárttiin.
Ii dárbbaš álšasáles johtit
Divodemiide sáhttá jearralit veahki earáin dahje ohcat neahtas rávagirjji ja lohkat das mo galgá ovdamearkka dihte molsut lámppá.
Muhtimin leat gártán geasehitge bieđganan mohtorgielkká eret meahcis. Ja darvánan gielkkáid roggan obbasis eret lea jo juohke reaissu dábálaš ášši.
– Ii dárbbaš šat álšasáles fitnat go roggá gielkká eret, cuigesta West go joavku lea goaivumin bivastatgállus ovtta mohtorgielkká dipma siivun fas ruovttoluotta luotta ala.
Sin ustitvuohta joatkašuvvá geassitge, go mohtorgielkásiivvut leat jo nohkan. Dalle ferte hutkat juoga eará astoáiggedoaimma, dadjala West.