Mannan lávvardaga ii lean mihkkige dáiggáid Levi čierastallanvielttis, go doppe ledje hálva juhkan dážat.
Pipsa Maikkula lei luopmomátkkis Levis ja oinnii mo sii, geat beaivvi ledje čohkkán restoráŋŋas juhkamin, vulge vieltái čierastallat váralaš vugiin.
Maikkula lea ieš čierastallan miehtá máilmmi, iige leat goassige oaidnán dakkár láhttema.
– In šat duostan dohko singuin oktanaga. Oaivvesnága fieradedje ja ravggadedje doppe. Ii lean dáigá go vel hirbmat fárttain njivžžodedje ceakkovielttis. Ii lean bere okta juhkan olmmoš, baicce olles joavku.
– Márkanastithan gal juollu, muhto čierastallanvieltái ii gálggašii diekkár dilis vuolgit skirvehallat, dadjá Maikkula.
Mihkkige váralaš ii leat dáhpáhuvvan
Levi Ski Resort doaimmajođiheaddji Jouni Palosaari lei iešge čohkkemin jugežiid eret vielttis.
Palosaari muitala, ahte lávvardaga deive vel leat unnit vieltefávttat barggus, go seamma áigge lei sis skuvlejupmi. Danne doaimmajođiheaddji lei iešge fáktan ja láidemin juhkan nuoraid eret čierastallanvielttis.
– Lihkus mihkkige ii geavvan, vaikko ledje restoráŋŋas menddo olu juhkan ja čeasihedje vielttis, dadjá Palosaari.
Juhkanvuođas čierastallan ii leat lágas gildojuvvon muhto alkohola sáhttá oidnot vielttis skihkahisvuohtan.
Doaimmajođiheaddji: Dážain earálágan čierastallankultuvra
Palosaari mielde gárrenvuođas čierastallit ledje nuorra dážat. Sii leat dehálaš guossit Levii, go sis lea ruhta.
– Sis lea binná earálágan čierastallankultuvra, heivehallá Palosaari sániidis.
Son muitala, ahte juhkan olbmuide eai vuovdde bileahtaid vieltái, eaige láigot čierastallanbiergasiid. Olbmot ieža fertejit váldit vásttu iežaset láhttemis.
Levi hohkahálla eandaliige válboriid áigge olbmuid márkanastit dohko. Palosaari dadjá, ahte eatnašat sis eai bahkke čierastallanvieltái dalle.
Lihkká Levi dorvvolašvuođahoavda Heikki Saarensalmi lea árabut muitalan Ylei, ahte oaivvesnága skirvehallan lea maiddái válboriid áigge váttisvuohtan.
Fállagoahtán maiddái láivves juhkosiid
Čierastallanvieltti gurrii huksejuvvon Tuikku-restoráŋŋa lea allelis Levi guovddáža. Doaimmajođiheaddji Jarkko Kuusisto dadjá, ahte maŋimuš jagiid áigge láhtten lea jorgalan buoret guvlui.
– Restoráŋŋan mii rávvet olbmuid vásttolašvuhtii. Min vástu ollá restoráŋŋii ja dan lahkosii. Mii eat sáhte diehtit mii dáhpáhuvvá ovdal, dahje dan maŋŋá, son muittuha.
Sii leat maid gidden fuomášumi sin juhkosiidda ja leat plánen garra juhkamušaid lassin láivves juhkosiid.
– Riedja ja šlápma lea vearrámus dakkár restoráŋŋain, mat leat guhkká rabas. Sidjiide, geat gáibidit ráfálut bottu, mii fállat dakkár saji. Tuikku steŋgejit áli diibmu 17. Jus lea dárbu, mii fuolahat das, ahte maŋimušge olbmot besset dorvvolaččat eret, vaikko táksesáhtuin.
Su mielas lea dehálaš, ahte restoráŋŋat rávvejit iežaset gussiid vásttolašvuhtii. Son lea oahpásmuvvan Gaska-Eurohpás čierastallankultuvrii, eaige doppe rávve olbmuid.
– Gal Suomas lea buoret dilli, son veardida.