Meahciráđđehus áigu juohkit boazodoalloguovllu njealji sierra guovžabivdoguovlun. Dán rádjai boazodoalloguovlu leamašan juhkkojuvvon guovtti oassái, muhto dál Meahciráđđehus áigu sirret boazodoalloguovllu uhcit bivdoguovlluide. Plána mielde Anár, Ohcejohka ja Soađegilli livčče okta guovlu.
Meahciráđđehusa meahcásteami áššedovdi Ahti Putaala muitala, ahte stuorámus sivva ođastussii lea dat, ahte sii háliidit dorvvastit bivddu sosiálalaš bissovašvuođa.
– Ulbmilin lea, ahte meahcásteaddjit eai čoggoše beare olu dihto guovlluide, muhto bivdu juohkásivččii dássedit, dadjá Putaala.
Lea jáhkehahtti, ahte guovžža nálledikšunbivdu ii ollašuva dán jagi boazodoalloguovllu olggobealde. Máddelabbos bivdomokta goit gávdnošii, go doppe vuvdet jahkásaččat juobe 1 900 guovžabivdolobi. Meahciráđđehus leage ráhkkanan ođastusain dasa, ahte dát bivdit ohcalit dál ođđa bivdoguovlluid.
– Máŋggat Mátta-Suoma bivdit soitetge dollet boahtte čavčča bivdui boazodoalloguvlui ja vejolaččat juobe Ruŧŧii, árvala Putaala.
Stuorámus oassi boazodoalloguovllu guovžžain goddojuvvo Badje-Kainuus ja Kuusamos
Guovžalobiid ollislaš mearis mearrida eana- ja meahccedoalloministeriija. Meahciráđđehus fas mearrida das, man ollu lohpebivdit leat guđege guovllus.
Dán rádjai Meahciráđđehus lea vuovdán lobiid, maiguin leamašan lohpi bivdit guovžža buot stáhta eatnamiin olles boazodoalloguovllus. Go dál juhket bivdoguovllu unnit osiide, de maid lohpevuovdin rievdá. Dál bivdi ferte mearridit, ahte guđe guovllus áigu bivdit.
– Juohke bivdoguvlui biddjo dihto lohpemearri, mii ráddje bivdiid meari, čilge Putaala.
Meahciráđđehusas goit deattuhit, ahte ođastus guoská dušše lohpebivdiid meari. Guovžžaid bivdoeari eai leat juohkimin ođđa guovlojuogu mielde, muhto dat guoská ain olles boazodoalloguovllu.
Ođđa guovlojuogus lea goit váldojuvvon vuhtii dat, mot guovžasálaš lea juohkásan ovddit jagiid. Stuorámus oassi boazodoalloguovllu guovžžain goddojuvvo Badje-Kainuus ja Kuusamos.
– Jus bivddu ii ráddje, de stuorámus ballun lea dat, ahte boazodoalloguovllu máttimus osiide Suomussalmii, Hyrynsalmii ja Kuusamoi čoggojit issoras olu bivdit, dadjá Putaala.
Guovžabivdu nohká boazodoalloguovllus, go ministeriija mearridan bivdoearri dievvá dahje maŋemustá golggotmánu 31. beaivve.
Meahciráđđehus lea gullan guovžabivdoáššiin Suoma fuođđoguovddáža golmma davimus guovllu. Go ođđa bivdoguovlluid leat juohkán, de ođastusas leat bivdán cealkámušaid maiddái earrát eará boazodoalloguovllu fuođđodikšunservviin, Bálgosiid ovttastusas, Sámedikkis ja Nuortalaččaid giličoahkkimis.