Lappi bolesis muitalit, ahte sidjiide leat dahkan rihkusalmmuhusaid mannan čavčča sámediggeválggain. Dutkamajođiheaddji Ilkka Rantahalvari mielde almmuhusat čoggojit moaddelogi, muhto dárkilis meari ii sáhte vel diehtit.
Boles ávžžuhii njukčamánus dieđáhusastis válgalogahallama olggobeallái báhcán olbmuid dahkat rihkusalmmuhusa ovdal cuoŋománu 21. beaivve.
Sámedikki válgalávdegotti lahtut navdojuvvojit rihkkosis jagi 2023 sámediggeválggaid oktavuođas. Sin navdet sivalažžan olggušteapmái ja virgegeatnegasvuođa rihkkumii.
Ášši duogábealde lea jagi 2023 válggaid válgalogahallan. Sámedikki válgalávdegoddi ii čáhkadan jagi 2023 jienastuslohkui buohkaid sin, geaid alimus hálddahusriekti lea dohko dohkkehan. Válgalogahallama olggobeallái báhce badjel 80 olbmo.
Áššis navdet rihkkosa, danin go válgalávdegotti mearridii áššis alimus hálddahusrievtti čovdosa vuostá.
Válgalávdegotti ságadoalli Aslak Pieski kommentere ášši oanehaččat.
– Sii dutket maid dutket, dadjala Pieski.
Boles: AHR ii sáhte váldit beali rihkosvuoigatvuođalaš beallái
Dutkamajođiheaddji čállá, ahte AHR mearrádusat gullet dieđusge ollislašvuhtii ja daid váldet vuhtii. Daid loahpalaš váikkuhusa ovdadutkamii son ii hálit vel árvvoštallat.
Suoma alimus hálddahusriekti mearridii ovdal beassážiid, ahte sámediggeválggaid galgá ordnet ođđasit ja válgalogahallamii lasihit 65 olbmo, geaid Sámedikki válgalávdegoddi ii lean dohkkehan AHR mearrádusaid vuostá.
Rantahalvari muittuha, ahte AHR lea mearrádusain árvvoštallan Sámedikki válgalávdegotti ja stivra mearrádusaid riektavuođa, muhto dat ii hálddahusduopmostuollun sáhte árvvoštallat, dahje váldit beali rihkkosvuoigatvuođalaš beallái.
Dán ášši čielggadit ovdadutkamis ja loahpas gearretriekti, masa rihkkosvuoigatvuođalaš áššit gullet, dahká iehčanas mearrádusa, jus ášši oba gitta dohko manná.