Gáregasnjárggas giliolbmuin lea dáhpin iđđes čohkanastit Hotealla Guossi restoráŋŋii ja doallat aisttan iđitparlameantta, dego ieža gohčodit iežaset iđitgáffebottu. Iđitdeaivvadeamis hállet gili áššiin ja mii dal de jo millii boađáš.
Bearjadaga várra čorgestedje sáhkafáttáid ja sátneválljejumiid, go beavddis čohkkái hárvenaš guossi, gean ii restoráŋŋas vuorddášii deaivat.
Okta iđitparlameantta fásta lahttu, Esa Vuomajoki lei ilus go Oulu bismágotti bismá Jukka Keskitalo bođii singuin gáfestallat.
– Dát lei hui fiinna dilálašvuohta. Ferten gal giitit bismmá go finadii dán searvegotti nuppi rávddas, iige ovtto čuoččo bere doppe nuppebeale rávddas, muitala Vuomajoki symbolihkalaš sániiguin.
Atná árvvus geahppa gáimmadeami girku njunnošiin
Oulu bismágotti bismá Jukka Keskitalo muitala, ahte oatnelanbottas gerge máŋggaid fáttáid gieđahallat, obalohkái eallima rávddas ravdii, čilge bismá.
– Hálaimet das, mii gullo dán guovllu nuoraide. Gieđahalaimet dieđusge searvegotti áššiid. Ságastallan guoskkahattai maiddái dan álbmotbeaivve dáhpáhusa, mas ságastalle das, heivego luohti girkui.
Bismái bázii dakkár govva, ahte gáregasnjárgalaččaid iđitparlameanta restoráŋŋas lea dehálaš ášši.
– Dáppe sáhttá ságastallat ja eandaliige njunnálagaid deaivat eará olbmuid. Mun gal ávžžuhan buohkaid boahtit iđitparlamentii, dadjá bismá.
Vuomajoki atná árvvus geahppa gáimmadeami bismán ja vejolašvuođa háleštit suinna áibbas dábálaš árgabeaiáššiin.
– Dákkár dilálašvuohta lei das buorre, ahte dat ii lean nu virggálaš. Juohke okta beassá hállat vaikko man áššis ja dat váldojuvvo vuhtii.
Oulu bismágotti bismá Jukka Keskitalo oktan joavkkuinis dahká bismádárkkistusa Ohcejoga searvegottis. 19.-21.4.2024 ja deaivá olbmuid miehtá giliid.