Karjalan kielen seuran bankrottupezä tässäh vie ei ole maksanuh järilleh valdivoavustuksii, hos opastus- da kul’tuuruministerstvu nenga on vuadinuh. Seuran endine paginavedäi, arhijepiskoppu Leo kiistäy kaiken dielon da on jo ehtinyh perustua uvven fondan karjalan kielen elospiendäh niškoi.
Ministerstvu piätti seuran talovuonpiendän eričystarkastandan jälles, gu bankrottupezän pidäy maksua järilleh zakonanvastazesti käytettylöi valdivonavustuksii vuozil 2017–2019. Järilleh perittäviä dengua allukse oli 325 000 euruo, ga nygöi hätkestyskorgoloinke miäry on jo piäl 365 000 euron.
Perindypiätökses on mennyh jo puolitostu vuottu, ga valdivo vie ei ole suannuh järilleh nimidä.
Halličusnevvos Joni Hiitola kiistäy, gu ministerstvas olis roinnuh huolenpidämättömytty Karjalan kielen seuran valdivonavustuksien andamizes libo valvondas. Kudamidägi opastuttavua nečis dielos yhtelläh on.
– Täs on nähty se, gu monivuodizis projektois pidäy kiinnittiä eričyksellisty huomavuo avustuksenpakiččijan talovehellizih iellytyksih lykystyö projektois, tovendau Hiitola.
Arhijepiskoppu kiistäy piätöksen järillehperindäs
Kieliyhtistyksen halličus sanoi omassah vastinehes vuvvennu 2021, gu ministerstval pidäs kieldävyö järillehperindyezitykses. Nygöi seuran paginanvedäi, arhijepiskoppu Leo kiistäy kaiken perindypiätöksen.
Pravoslaunoin kirikön arhijepiskoppu ruadoi karjalan kielen seuran paginavedäjänny allus algajen bankrotakse menendässäh. Häi suuttuu kuultuu kyzymyksen perindäh näh.
– Nengostu piätösty nikonzu ei ole luajittu. Seuru nikonzu ei ole nähnyh mostu piätösty. Nimidä ei ole peritty järilleh, sendäh gu ei ole löydynyh perustehtu sih niskoi, sanoi arhijepiskoppu Leo Ylele mennyt nedälil nellänpiän.
Endizen paginavedäjän mugah yhtistyksen talovushalličendas ei olluh vigua libo vajavuttu.
– Kaikis dengois, kudamat saimmo, raportuičimmo, da kai raportuičendu on ministerstvas hyväksytty, korostau Leo.
Hänen mieles seurua on čakattu nareko.
– Kai neče paha pagin on vaigevutannuh karjalan kielen azemua, nenga arvivoiččou Leo.
Arhijepiskoppu saneli vuottamattomasgi dielos: uvves Karjalan kielen fondas, kudai ruadau vähembistökielen puoles.
– Se rubieu jatkamah Karjalan kielen seuran ruandua lujembien resursoin vuoh.
Häi iče ruadau ligakuul registriiruitun fondan paginanvedäjänny, ga kieldäy kirikön ozanottamizen.
– Ollen minä sie, eihäi se tarkoita, gu kirikkögi olis. Kirikkö ei ole keräl, tovendau arhijepiskoppu.
Pezänsellitändy iellehgi kesken
Opastus- da kul’tuuruministerstvu vuottau iellehgi pezänsellitändiä, kudamua julgissellittäi azuu valdivon varoil.
– On julgissellittäjän dielo duumaija, pidäygo midä luadie seuran toimihengilölöi kohtah, tovendau halličusnevvos Hiitola.
Häi ei ole varmu sit, suannougo valdivo konzutah järilleh hos vuitin zakonattomasti käytettylöis dengois.
– En pie sidä ihan tovennägözenny dielonnu, ei tulle pezäh kuspäitah äijy dengua, nenga duumaiččou Hiitola.
Julgissellittäjänny ruadai advokattu Aki Pietarinen Jovensuuspäi sanou, gu piätös mahtollizes korvavusvuadimukses on ”virguniekoin sellitändöin” täh viegi avvoi. Hänen arvivon mugah dielo selgenöy tänä keviän.
Pietarinen sanou, gu processu on kestänyh hätken. Dielo yhtelläh ei vahnene.
Konzu sellitändy roih valmis, bankrottupezä piättäy jatkotoimiloih näh. Pagin on mahtollizes korvavusvuadimukses halličuksen ozanottajile vahingos, kudai heijän täh pezäle rodih.
Päivännouzu-Suomen yliopistos, kus opastetah karjalan kieleh, ei tietä moizis tapahtuksis, konzu karjalaine yhtehistö olis kärzinyh Karjalan kielen seuran negatiivizes julgižuos.
– Meijän ruandas karjalažus nägyy pozitiivizennu. Karjalan kielen azemu yliopistos nygöi on luja, garantiiruiččou humanistizen ozaston johtai Esa Penttilä.
Yliopisto parahite nevvottelou ministerstvanke karjalan kielen opastandan jatkodengoitukseh näh vuozile 2025–2028.