Jus dovdá boares dálkemearkkaid, ii dárbbaš guldalit dálkediehttiid. Reahkká, ahte dihto beivviid áigge vilppasta glássaráigge olggos, merke muitui dálkki ja de diehtá justa makkár dálkkit šaddet.
Dálkeberošteaddji Sverre Porsanger oinnii jo guovvamánus makkár dán giđas šaddá. Ja riektahan dat manai, dánge jagi.
– Máhtebeaivve njázudii, de dalle bohtet dat cukŋot, čilge Porsanger.
Nubbi duođaštus galbma giđas bođii geassebeaivve 14.4.
– Jus galbmá geassebeaivái, dat leat 40 jándora čoaska dálkkit. Dat mearkkaša dan, ahte čoaskasat bistet gitta miessemánu 22. beaivve rádjai.
Porsanger mearkkui muitui geassebeaivvege dálkki.
– Mun gal gehččen, dat lei miinus bealde. Vaikko ii lean go moadde gálbmagráđa, dat lei jikŋon šilju.
Geassebeaivvi maŋŋá bohtet suvvijat ja dán giđa fas okta duođaštus lasi. Jus dieid ijain galbmá, de doallá Irján beaivves čoaskasiid, dárkilabbot daddjon golmma geardde ovcci jándora. Ja fas seamma loahppaboađus, galbmasat bistet miessemánu loahpageahčai.
Miessemánu loahpas gánniha muitit boares Erkke-beaivvi. Dat lea 31.5. Dat gielista geasi dálkki.
– Jus dien beaivve lea báhkka, geasi dálkkit leat justa nuppeláganat olles geasi. Dat lea hui váralaš mearkabeaivi. Dalle ii galgga leat báhkka, dalle galget leat borggat, láhttesta Porsanger.