Váibmu julká ja gieđat doarggistit. Dat lea sihkkarit oahpes dovdu máŋgasiidda, geat leat oassálastán sámenuoraid dáiddadáhpáhussii.
Ikte duorastaga Anáris máŋggat mánát ja nuorat gorgŋo lávddi ala dánsut, juoigat, livđet ja leuddet. Dánsuma ja juoigama lassin temán ledje maid oanehisfilmmat ja govvadáidda.
Dán jagi sámenuoraid dáiddadáhpáhusas sáddejuvvo viidáset riikkadási Nuorra Kultuvra On air -gáiddusdáhpáhussii Gáregasnjárgga skuvlla oahppiid Inka Rasmus, Antti Laiti ja Matti Utsi oanehisfilbma Čuoigantuvra.
Dan lassin dáhpáhusas mieđihedje gudnemáinnašumiid iešguđet temáid ja ahkejoavkkuid mielde. Okta gudnemáinnašumi oažžuin lei Njuorggáma skuvlamánáid joavku. Go bálkkašuvvojedje, de gal lei somá ruvsu gieđas lávdde alde čearsát.
– Mus bođii dakkár vuoitomokta, dadjá Anni-Siviä Länsman.
– Veháš áigge dassái mun ledjen aivve nu, ahte mun in boađe oažžut bálkkašumi, muhto mun ožžon ja dat lei oalle somá, dadjáges Ásllat Niillas Länsman.
Bálkkašumis fuolakeahttá eaba soai goit áiggo nu stuorrát ávvudit.
– Varra áiggun fitnat áhku luhtte muitaleamen, dadjá Anni-Siviä Länsman.
– Mun áiggun vuoiŋŋastit ja bargat maid nu somá, šuohkiha lihkolaš Ásllat Niillas Länsman.
Eanet sámenuoraid dáiddadáhpáhusa dovdduin sáhtat lohkat dán artihkkalis. Doppe gávdnojit maiddái buot gudnemáinnašumi ožžon mánáid ja joavkkuid namat.