Giliservviide, oasusgottiide dahje guolledoalloguovlluide rahpasa dál vejolašvuohta seailluhit sámi kultuvrra ja oahpahit árbevirolaš Deanu luossabivddu, jus sidjiide mieđihuvvo spiehkastatbivdolohpi.
Suoma riikkabeaivvit leat gaskavahku dohkkehan Deanujoga bivdosoahpamuša.
Bivdosoahpamuša guolástannjuolggadusa mielde sámi guolástankultuvrra oahpahus oažžu vejolašvuođa spiehkastatlobiid bokte. Ovttaskas olmmoš ii sáhte mánáidis okto oahpahit, baicce dan galgá dahkat organisašuvdna.
Ovdamearkka dihte muhtun sámesearvi sáhtášii ohcat Lappi EJB-guovddážis spiehkastatlobi, jus áiggošii oahpahit ja sirdit guolástanmáhtu ovddosguvlui.
Go soahpamuššii lea girjejuvvon sámekultuvrra sirdin, de dainna ráddjejit earáid olggos lohpeohcamušain.
Eana- ja meahccedoalloministeriija ráđđádalli virgeolmmoš Tapio Hakaste lohpádaddá, ahte jo boahtte geassái livčče vejolaš ohcat spiehkastatlobiid.
– Ohcamii ii leat vel addojuvvon áigemearri. Das ságastallat čuovvovažžan.
Spiehkastatlobi ulbmil ii leat goddit olu luosaid
Spiehkastatlobit leat, dego namma jo muitala, spiehkastatlobit. Daid mearri ii sáhte leat stuoris. Spiehkastatlobi ulbmil lea namalassii sirdit sámiid dieđu ja dáiddu, ii eisege dat, ahte goddá olu guliid, muittuha Hakaste.
– Oaiveoasis lea maiddái dat, makkár dat guolásteapmi boahtá leat. Man olu guolit jápmet dan bivddu dihte vai leago daid vejolaš seastit bivddu oktavuođas.
Hakaste mielas dát leamašan váttis proseassa. Sii sávvet luossanáli nanosmuvvat. Bivdogildosa dihte duovveluosat leat eanet gorgŋon Detnui.
Luondduriggodatguovddáš muitalii ođđajagimánus, ahte boahtte geasi lea vuordimis heajos luossageassi.
– Maŋimuš jagit leat leamašan váddásat, go jahkásaččat lea gártan smiehttat mo ovddosguvlui ja mii lea vejolaš. Sávvat maid, ahte spiehkastatlobiin livčče ávki guolástankultuvrra seailumii, dadjá Hakaste.
Suoma presideanta Alexander Stubb vuolláičállá ođđa bivdonjuolggadusaid bearjadaga 26.4. Dat boahtá fápmui miessemánu álggus.
